နောက်ဆုံးအချိန်မရောက်ခင်ထိ သူရှိနေခဲ့တယ်
အောက်မှာဖော်ပြမယ့်စာစုကို လွန်ခဲ့တဲ့ခြောက်လလောက်က ရေးခဲ့တာဖြစ်တယ်။
တစ်စုံတစ်ခုရဲ့ စေ့ဆော်မှုကြောင့်ရေးဖြစ်ခဲ့တာဆိုပေမယ့်
စာပါအကြောင်းအရာတိုင်းဟာ အဲဒီအချိန်ဖြစ်နေခဲ့သောစိတ်ကို ဖြတ်ယူထားခြင်းမျိုး။
တွယ်တာစရာတစ်ချို့၊ ခင်တွယ်စရာတစ်ချို့ အဲ့ဒီအရာတွေ၊
ကွယ်ပျောက်သွား၊ဒါမှမဟုတ် ပျောက်ဆုံးသွားတဲ့အခါ၊
တည်တည်ငြိမ်ငြိမ်နဲ့ရင်ဆိုင်နိုင်ဖို့ ကြိုးစားကြည့်ပေမယ့် မရခဲ့ပါဘူး။
အငိုလွယ်၊အရှိုက်ခက် ဆိုတဲ့စကားရပ်ကို ဒီနေရာမှာသုံးရင် အဆင်ပြေလိမ့်မယ်ထင်တယ်။
ပျောက်ဆုံးသွားတဲ့လူတွေ၊ လမ်းခွဲသွားတဲ့လူတွေ၊ သူတို့တွေအတွက် ဒီစာကိုရည်ညွှန်းတယ်။
ဒီစာဟာ သူတို့ကို သတိရနေဆဲပဲဆိုတာကို ပြောပြတဲ့အကြောင်းအရာတစ်ခုပါပဲ။
နိုးကြား( အိပ်မပျော်) သော သူအတွက် ညတာရှည်၏။
ခရီးပန်းသော သူအတွက် ယူဇနာခရီးသည် ရှည်၏။
သူတော်ကောင်းတရားကို မသိကုန်သော
လူမိုက်တို့အတွက် သံသရာသည်ရှည်၏။
ဓမ္မပဒစာပိုဒ်တစ်ခုပါ အသွားအလာ အရဆို၊
ကျွန်တော်သည်လည်း လူမိုက်တစ်ယောက် ဖြစ်နေပါလိမ့်မယ်။
နောက်ဆုံးအချိန်မရောက်ခင်ထိ သူရှိနေခဲ့တယ်
လောကနိယာမများ မပြောင်းလဲခဲ့ပါ။
ကောင်းကင်သည်လည်း ရှိမြဲအတိုင်းရှိနေခဲ့၏။
နေသည်ပုံမှန်အချိန်တွင်အပူရှိန်ပြင်းပြင်းဖြင့် ထွက်ရှိလာပြီး
လသည်လည်း အချိန်မှန်အလင်းဆောင်လာတတ်သည်။
ယခုအချိန်တွင်ကား
ကောင်းကင်မှာပိုမိုက်လာသည်။
လရောင်ပျောက်ဆုံးမှုတွေပိုလာကြ၏။
လမိုက်ညတွေ စိုးမိုးလာသည်။
ရှေ့ဆက်ဘာဖြစ်မည်ကို ကျွန်တော်မသိ
ကျွန်တော်သည် ဘာမှမသိသောလူသားတစ်ဦးဖြစ်သည်။
ထိုအရာကပင် ကျွန်တော်ဘ၀ကို အဆုံးသတ်ပေလိမ့်မည်။
မဆိုစလောက်အပွန်းအပဲ့လေးတစ်ခုက
စိတ်ကိုအနှောက်အယှက်ပေးခဲ့သည်။
စိတ်တွေမြန်လာ၏။
အမှားတွေဆက်တိုက်လုပ်မိတော့မည်။
ပတ်ဝန်းကျင်လှိုင်းတို့မကောင်းပါ။
အမှောင်ကြီးစိုးခြင်းတို့ ဘယ်ရွေ့အထိဆက်ရှိနေမည်ဆိုတာ မသိပါ။
အလင်းရောင်အပြည့်နဲ့ အားလုံးပြန်ဆုံတွေ့ကြရမည့်နေ့။
အဲဒီနေ့ကို ကျွန်တော်မျှော်လင့်မိသည်။
ကျွန်တော် မျှော်လင့်နေချင်သည်။
ဘာမှမသိတဲ့အပြင် ဘာမှမတတ်သောကျွန်တော်သည်
အိမ်အပြင်ပြတင်းဝ၌် လှမ်းမျှော်ကြည့်နေရင်းကပင်
တိမ်မည်းတွေ ဖြတ်သွားတဲ့ကြားက
မြင်တွေ့ခွင့်ရမည့် လရောင်ကို မျှော်ကြည့်နေမိသည်။
ကျွန်တော်သည်ကံမကောင်းပါ။
ကံမကောင်းတတ်တော့ကျွန်တော့်အဖို့
ကျွန်တော်လိုချင်သည့်အရာတွေဘယ်သောအခါကမျှမရခဲ့ပါ။
ထိုသည်ပင် ကျွန်တော်သည် ဘာမှမသိ၊ ဘာမှမတတ်သောလူတစ်ယောက်အပြင်
အလွန်တရာ လိုချင်လောဘရှိခဲ့သော လူသားတစ်ယောက်ဖြစ်နေကြောင်း
အလန့်တကြားသိရှိလိုက်ရလေသည်။
ထို့သို့အလန်တကြားတွေ့ရှိခဲ့ပြီးသည့်နောက်
နောက်တစ်နေ့ သတင်းစာနာရေးကြော်ငြာတွင်
ကျွန်တော်၏နာမည်ပါရှိလာပါကလည်း
မည်သူမျှအံ့သြကြလိမ့်မည်ဟု ကျွန်တော်မထင်ပါ။
ထိုနေ့ရက်သည်လည်း ကျွန်တော်၏မျှော်လင့်ချက်တို့ရောက်မလာခင်
ရောက်ရှိလာနိုင်သော အရာတစ်ခုဖြစ်နေပေလိမ့်မည်။
You received this email because you are subscribed to the real_time feed for http://openmind.net63.net/?feed=rss2. To change your subscription settings, please log into RSSFWD.