ရှင်သန်နေဆဲ သီချင်း
မနက်ဖြန်ဟာ လှန်ကြည့်ခွင့်မရှိတဲ့
ဖဲတစ်ချပ်ဆိုရင်
ကုန်ဆုံးသွားတဲ့ အတိတ်ဟာ
ကောက်ကျစ်တဲ့ ကစားပွဲတစ်ခုရဲ့ နိဒါန်းပဲ
အသစ်မရှိတော့ အဟောင်းကိုပဲ
ဖာထေးပြုပြင်ပြီး ပြန်သုံးနေရ
သီအိုရီတွေမှားနေသေးသ၍
နာကျင်ဆုံးရူံးမူတွေနဲ့ ကြုံနေရဦးမယ်။
ကြိုက်ဈေးမရလို့
ရသလောက်ဈေးနဲ့ ရောင်းပြန်ရမှာလား
တိုတောင်းတဲ့ လူ့ဘ၀မှာ
လုပ်ချင်တာ လုပ်ခွင့်မရပဲ
မလုပ်ချင်တာတွေ လုပ်နေရတာကများ
ငါသွားချင်တယ်
ပိတောက်တွေပွင့်တဲ့ အရပ်ဒေသတစ်ခုဆီ
ငါပြန်ရချင်တယ်
တစ်ခါက ရင်ခုန်လိူက်မောဖွယ် နွေဦးညများ။
အမြဲတမ်း သတိတရ ဖြစ်နေဖို့ဆိုရင်
ဖျောက်ဖျက်မရတဲ့ အမာရွတ်တစ်ခု
လိုအပ်ကောင်းလိုအပ်မယ်
တစ်ခုခု မပေးပဲနဲ့ တစ်ခုခု ရပါ့မလား
ပျံသန်းနေတဲ့ စိတ်ကူးနောက်
အရူးလိုလျှောက်လိုက်လို့
ဆောက်တည်ရာမဲ့ နေ့ရက်တွေမှာ
ငါ့အလွမ်းကို လူတွေမသိကြဘူး။
မည်သို့ဆိုစေ
ခွန်အားရှိသ၍
ပျံသန်းနေရဦးမယ်
လူ့ဘ၀ဆိုတာ အတိတ်အကြောင်း
စားမြုံ့ပြန်နေရုံနဲ့ မပြီးဘူးမဟုတ်လား။
စကားနည်းနည်းပြောပြီး များများနားထောင်ပါ
လူတွေက ဟန်ဆောင်ဆက်ဆံနေကြ
Self-selling ဆိုပါလား
ကျနော်ကတော့ ကိုယ့်ကိုကိုယ်ချရောင်းဖို့
ဝါသနာမပါဘူး မိတ်ဆွေ။
သစ်တစ်ပင်ခုတ်လှဲတိုင်း
နေ့တစ်နေ့ကုန်ဆုံးသွားတိုင်း
အဖိတ်အစဉ်များတဲ့ သက္ကရာဇ်တွေထဲ
သိဒ္ဓတ္ထ ထားခဲ့တဲ့ တရားကို
လက်တွေ့ မြည်းစမ်းကြည့်ခွင့်ရခဲ့။
အိမ်ကြက်ချင်းအိုးမဲသုတ်ခွပ်နေသေးသ၍
ဆုံးရူံးမူတွေကြုံနေရဦးမယ်
မိုးရာသီရောက်နေတာတောင်
နွေဦးကို တမ်းတနေမိသူ။
ခင်ဗျားဘက်ကကြည့်တော့ခေါင်း
ကျနော့်ဘက်ကကြည့်တော့ပန်း
မည်သို့ရှိစေ
ပြိုင်ပွဲဆိုတာ
အနိုင်ရဖို့လိုရင်းမဟုတ်လား။
အလံကိုင်ခွင့်ရတဲ့ မိတ်ဆွေများ
သင်တို့ငြိမ်းချမ်းပါစေ
ပြီးတော့ သင်တို့လက်ထဲက အလံ
မြဲမြံနေပါစေ
ဘယ်သူပဲဖြစ်ဖြစ်
(အနည်းဆုံး)
တစ်ယောက်ယောက်ကတော့
အဆင်ပြေဖို့လိုတယ်မဟုတ်လား။
ကျနော်သွားပါဦးမယ်
ငြိမ်းချမ်းနွေးထွေးတဲ့ ရင်ခွင်တစ်ခုဆီကိုလား
ကားစင်တစ်ခုဆီကိုလား
ဘာကများသေချာလို့လဲ။
မနစ်မြုပ်သေးသ၍
လှော်ခတ်ကြ
တစ်ချိန်ချိန်တော့
ကမ်းကပ်ခွင့်
ရတန်ကောင်းရဲ့……..။
ငြိမ်းချမ်းအောင်
You received this email because you are subscribed to the real_time feed for http://nyein-chan-aung.blogspot.com/feeds/posts/default. To change your subscription settings, please log into RSSFWD.