ကချင် အဖွားကြီးရေးရာ ကျွမ်းကျင်သူ
ဓါတ်ပုံ - မန္တလေး တုဘ်မှ ယူသည်။
ထားပါတော့ အခုတလော ရေစကြို … အဲလေ … ရေဒီယိုမှာ ခပ်စွာစွာ ဘာ … ရေးရာ ကျွမ်းကျင်သူ၊ ညာ … ရေးရာ ကျွမ်းကျင်သူတွေ ခပ်စိတ်စိတ် အာဖျံကွီး လေပေါတာတွေ တွေ့ရတော့ ဒူကဘာလဲ အောက်က အကြောင်းအရာမှာ အဖွားကြီးတွေ အကြောင်းပဲ ရေးထားမိပြန်တော့ သူတို့လိုပဲ ကျွမ်းကျင်တဲ့သူ ဖြစ်ချင်တဲ့ ဒူကဘာမှာ "ကချင် အဖွားကြီးရေးရာ ကျွမ်းကျင်သူ" ဖြစ်လာပါတော့တယ်။ သင်လည်း ဘာရေး … ညာရေးများ ကျွမ်းကျင်နေမလား? ရေးထားခဲ့လေ သိရတာပေါ့ ! ဒူကဘာသူရိန် အရောက်လာမှာပါ… အဲလေ … ယောင်လို့ ဘီဘီရှီ ။
၅ည ဆို x x x x x
ဟိုးရှေးရှေးတုန်းက အဲလေ … လွန်ခဲ့တဲ့ အနှစ်၂၀လောက်က ရန်ကုန်စက်မှု တက္ကသိုလ် ကျောင်းသား ကိုဘုန်းမော် သေဆုံးရာက စလို့ မြန်မာ တနိုင်ငံလုံးကို ဒီမိုကရေစီ တိုက်ပွဲ ခေါ်လိုက်တဲ့ ရှစ်ရက် ရှစ်လ ရှစ်ဆယ့် ရှစ်ခုနှစ် နေ့မှာဘဲပေါ့။
မြန်မာပြည် မြောက်ပိုင်း ကချင်ပြည်နယ်ရဲ့ မြို့တော် မြစ်ကြီးနားမြို့ မှာပေါ့ အောင်နန်းရိပ်သာ အရပ်မှာရှိတဲ့ အခြေခံပညာ အထက်တန်းကျောင်း အမှတ် (၂) ကနေ စတင်လို့ အမျိုးသားရေး ခွပ်ဒေါင်းစိတ်ဓါတ် နဲ့ ကျောင်းတော်သားတွေ တပါတီ အာဏာရှင် မြန်မာဆိုရှယ်လစ် လမ်းစဉ်ပါတီ ကို ရဲဝံ့စွာ တပြည်လုံးနဲ့ အတူလိုက်ပါလို့ စနစ်ပြောင်းဖို့ အာခံတော်လှန်ကြယင်း မြို့သစ် အရပ်မှာရှိတဲ့ အခြေခံပညာ အထက်တန်းကျောင်း အမှတ် (၃) အနား ရောက်တယ် ဆိုယင်ပဲ စစ်တပ်၊ ရဲ နဲ့ ကျောင်းသားတွေ ထိပ်တိုက် တိုးကြတာ ရဲက ကြောက်ပစ်ပစ်ပြီး ကျောင်းသား တဦး ကျဉ်သင့်ပြီး ကျဆုံးခဲ့ရတယ်။
ဒီဖြစ်ရပ်ကို မြိုခံလူထုတွေ မခံစားနိုင်လို့ ပေါက်ကွဲကြပြီး နောက် ပင်လုံစာချုပ်မှာ လက်မှတ်ထိုးတုန်းက ပါတဲ့ ဒူဝါတွေ၊ ဒုတိယကမ္ဘာစစ်တုန်းက ကချင်၊ ဂေါ်ရခါး လူမျိုး စစ်ပြန်ကြီးတွေ၊ ဖ.ဆ.ပ.လ ခေတ်က အမတ်တွေ၊ ဦးဆောင်လို့ ကျောင်းသား၊ ပြည်သူ လက်တွဲပါဝင်ကာ တပါတီ အာဏာရှင်စနစ်ကို ရှုတ်ချကြသတဲ့ ။
ဒီအချိန် သားမင်္ဂလာဆောင်မှာ ကားသော့တွေ အများကြီး လက်ခံရရှိပြီး၊ လက်သီးမှာ ကျော်ဘ လို့ အမည်ရတဲ့ မြောက်ပိုင်းတိုင်း စစ်ဋ္ဌာနချုပ်တိုင်းမှူး ဗိုလ်ချုပ် ကျော်ဘ ဟာ ဒီဖြစ်ရပ်အတွက် သိပ်စိတ်ဆိုးပြီး သီတာရေစင်ကြီးနားက အမှတ်(၈) စစ်ထောက်လှမ်းရေးကို ခေါ်ကြိမ်းသတဲ့၊ ဒီတော့ ထောက်လှမ်းရေးက လဲ မဲမဲမြင်ရာ ဖမ်းတော့တာပါပဲ၊ မီးသွေးရောင်းသူတောင် မဲလို့ဖမ်းတယ်ဆိုပဲ၊ ဦးဆောင် ကျောင်းသား အတော်များများ ဖမ်းခံကြရပြီး အတော်များများလည်း တောမခိုပဲ တောင်ခိုကြသတဲ့ ( ကချင် လွတ်မြောက်နယ်မြေက တောင်ပေါ်မှာ ရှိလို့ပါ )။
အဲဒီ အထဲ ဖတဆိုး ကချင်ကျောင်းသားလေး တဦးလဲ ဖမ်းခံရတယ်၊ နောက် ရက်သတ္တပါတ် တပါတ်နီးပါး အကြာမှာ မြို့လည် မြို့မအရပ်မှာ ရှိတဲ့ အမှတ်(၁) ရဲစခမ်းမှာ ကချင်လူမျိုး အဖွားအိုတဦး ကချင်လို ပြောပြောပြီး ရဲစခမ်းရှေ့မှာ လာလာ ငိုနေသတဲ့၊ အစပိုင်း တရက်မှာ ရဲစခမ်းကလဲ တိုင်းပြည်ကပူ၊ တိုင်းမှူးက ဆူသမို့ သတိမထား မိကြဘူးတဲ့၊ နောက်နေ့လဲ အဖွားအိုက တိုင်တည်ပြောသလိုမျိုး စခမ်းရှေ့ လာလာငိုနေပြန်တော့ စခမ်းမှူးက သတိထားမိပြီး ကချင်အဖွားအို ကို စကားနားလည်သူနဲ့ ခေါ်တွေ့ပြီး အကျိုးအကြောင်း မေးမြန်းတော့ အဖွားအိုက အခုလို ပြောသတဲ့ " နင်တို့ အမှုထမ်းတွေ ညာတယ် ငါ့သားကို လာဖမ်းတုန်းက ၅ည ဆို …. ငါစာမတတ်ဘူး ဆိုပြီး ငါ့ကို မလိမ်ကြနဲ့ …. အခုဟာက ၅ည မကဘူး ၆ည ရှိပြီ …. ၆ည …. ရှိပြီ " လို့ ရှိုက်ကြီးတငင် ငိုပြီး ဆိုသတဲ့လေ ။
အုန်းမြင့် အတွက် x x x x x
သိပ်မကြာသေးတဲ့ ကာလတခု ဆီမှာလည်း တိုင်းမှူး ဗိုလ်ချုပ်အုန်းမြင့် မြစ်ကြီးနားမြို့ဆီကို မြောက်ပိုင်းတိုင်းစစ်ဋ္ဌာနချုပ် တိုင်းမှူး အဖြစ်နဲ့ ပြောင်းလာပါတယ်….။ သူ ရောက်ပြီး မကြာခင်မှာ ပြည်သူတွေ တန်၏၊ မတန်၏ နိုင်၏၊ မနိုင်၏၊ မစဉ်းစားဖူး အမိန့်တွေ တသီတတန်းကြီး ထုတ်ကာ မြစ်ကြီးနားမြို့ကို ထုံးသုတ်၊ ဆေးမှုတ်၊ ချုံခုတ်၊ မြောင်းတူး လုပ်ခိုင်း ပါလေရောလား….ဗျာ။
သူတို့တွေ ဂေါက်သီးရိုက်လေ့ရှိတဲ့ မြစ်ကြီးနား ဂေါက်ကွင်းအနား ကပ်ရက်မှာ အင်ဂျန့်ကောင် ဆိုတဲ့ ရပ်ကွက်ရှိတယ်၊ အဲဒီရပ်ကွက်မှာ လင်သေ သားဆုံး အဖွားအိုကြီး တယောက်နေတယ်၊ တိုင်းမှူး အမိန့်ထုတ်တော့ အောက်ဆွဲတွေလဲ မနေနိုင် မထိုင်နိုင် ရပ်ကွက်တွေမှာ အမိန့်ကို သက်ရောက်စေ ရတာပေါ့။
၇အိုကြား ၈အိုကြား ရှိတဲ့ အဖွားကြီး ခမျာမှာ ခြံစည်းရိုးတွေကို တကိုယ်ရေ တကာယ ထုံးသုတ်နိုင်ပေမဲ့ အိမ်ရှေ့တွေမှာ ဒူးဆစ်လောက်ရှိတဲ့ မြောင်းတူး ရတာ ၇ရက်တပါတ် လောက်တော့ ကြာတာပေါ့ ၊ အခု က.ယ.က လို့ခေါ်တဲ့ ရပ်ကွက်ကောင်စီက မပြီးသေးဖူးလား? လို့ ခဏခဏ တိုက်တွန်းလွန်းလို့ သေငယ်ဇောနဲ့ မျောအောင် လုပ်နေရတဲ့ အဖွားအို ခမျာ ... မြောင်းတူးနေတဲ့ တညနေမှာ….။
တိုင်းမှူး အုန်မြင့် ဂေါက်သီးရိုက်ယင်း အဖွားကြီး ခြံအနား ဂေါက်သီးရောက်သွားလို့ သွားကောက်ယင်း အမယ်အိုကြီးကို တွေ့လို့ " အဒွီး (အဖွား) ဘာလုပ်နေတာလဲ? " လို့မေးတော့ " အေး… အုန်းမြင့် အတွက် ကျင်းတူးနေတာဟေ့ " လို့ လှည့်မကြည့်ပဲ ဆိုသတဲ့၊ ကချင် အဖွားကြီးခမျာ အုန်းမြင့် ခိုင်းလို့ လုပ်တာ အုန်းမြင့် အတွက်လို့ တွေးထင်နေမလားပဲ...? ဒူကဘာတော့ ဒီလိုသာ ရကြကြေးဆိုယင် နေပြည်တော်အတွက် ….! ကျင်းတူးမလား … တူးနိုင် ပါသေးရဲ့ ။ အဟေ ဟေး....သက်မွန်မြင့်နဲ့ ကျင်းတူးနိုင်တယ်ဗျ ..... ဆိုပြီး တီဗွီကြော်ညာ တပုဒ်လောက် ရိုက်လိုက်ချင်သေး....။
သူတို့ အကြောင်းရေးယင်း ရေဒီယိုက သူများတွေလို ဒူကဘာ့ မှာတော့လေ... လေ့လာ ကျွမ်းကျင်သူး ကို ဖြစ်လို့ …..။
You received this email because you are subscribed to the real_time feed for http://chittemanawmyae.blogspot.com/feeds/posts/default. To change your subscription settings, please log into RSSFWD.