အပါးတော်မြဲ
ကောင်မလေးရေ...
ငါဟာ လူသားတစ်ယောက်
မဖြစ်နိုင်ခဲ့ရင်
ရွှေကြိုးတစ်မျှင်တော့ ဖြစ်ချင်ရဲ့၊
မင်းရဲ့ ညာခြေကျင်းဝတ်မှာ လှဲလျောင်း
ဆူး, ညှောင့်ခလုတ်တွေ အတူကျော်လွှားရင်း
ငါ လျောင်းစက်ရာ အရေပြားလွှာအောက်
တောက်လျှောက်စီးဆင်းနေမယ့်
သွေးကြောတို့ရဲ့ တိုးဝှေ့ကျီစယ်မှု
ရင်ခုန်ခံစားရင်းနဲ့
မင်းရဲ့ခြေတစ်လှမ်း
ကုဋေတစ်သန်း တန်စေချင်တဲ့
ရွှေကြိုးကလေး အဖြစ်နဲ့ပေါ့၊
ကောင်မလေးရေ...
ငါဟာ လူသားတစ်ယောက်
မဖြစ်နိုင်ခဲ့ရင်
ပိုးကောင်လေးတစ်ကောင်တော့ ဖြစ်ချင်ရဲ့၊
မျက်ဝန်းတစုံရဲ့ စက်ကွင်းအောက်
ခေါက်တုံ့ပျံသန်းရင်း
အတောင်ပံတွေ အင်အားမဲ့ချိန်
ကျေနပ်စွာ ခုန်ချလိုက်မကွဲ့
အသေခံ လေသူရဲတို့ရဲ့
စိတ်ဓါတ်မျိုးနဲ့ပ၊
ကြည်လဲ့လဲ့နစ်မြုပ်မှုထဲ
သိမ်မွေ့စွာ ကူးခတ်ရင်း
မြတ်နိုးမှုတဒင်္ဂရဲ့ အလွန်မတော့
မင့်မျက်ဝန်းအိမ် ဂူဗိမာန်ထဲ
ငါ့ရဲ့ဝိညာဉ် အပ်နှင်းခဲ့မယ်၊
ကောင်မလေးရေ...
ငါဟာ လူသားတစ်ယောက်
မဖြစ်နိုင်ခဲ့ရင်
'သန်း' ကလေးတစ်ကောင်တော့ ဖြစ်ချင်ရဲ့၊
ခပ်ဖွာဖွာ ဆံပင်တောထဲ
မြတ်နိုးဖွယ် ဆံနွယ်ဒန်းကို ယီးလေးခိုလို့
မင်းရဲ့ တွေးခေါ်မှုတွေပေါ်လမ်းလျှောက်
နူးညံ့စွာ ခြေဖျားထောက်လို့ပေါ့၊
ငါ့အတွက် ဖြစ်တည်မှု
မင်းအတွက် ရှက်စရာ
(ဒီလိုဆိုရင်တော့)
ခပ်ကြမ်းကြမ်းဝင်ရောက်လာမယ့်
ဘီးစိပ်တစ်ခုရဲ့အဖျား
ပြတ်သားစွာ လိုက်သွားလိုက်မကွဲ့
ပေးဆပ်ဖို့ဆိုတာ
ကြိုတွေးပြီးသားပါကွယ်၊
ကောင်မလေးရေ...
ငါဟာ သက်ရှိဘဝတစ်ခု
မရခဲ့တောင်
တစ္ဆေတစ်ကောင်အဖြစ် ရောင့်ရဲနိုင်ပါတယ်၊
မင်းရဲ့ ဖြစ်တည်မှုအတွက်
ရဲဝံ့စွာ ကာကွယ်ရင်း
နေအလင်းရဲ့အောက်မှာ သက်တော်စောင့်
လမင်းရဲ့အောက်မှာ အိပ်ဖန်စောင့်ပေါ့၊
နှစ်ခြိုက်စွာအိပ်နေမယ့် မင်းအပါး
ကြည်မွေ့စွာ ခ,စားရင်း
(လူ သိပ်မသိတဲ့)
ဘယ်ဖက်မျက်ခုံးထဲက
အိမ်တွင်းပုန်း မှဲ့ကလေးနဲ့အတူ
သက်တမ်းရှိသရွေ့
ဖြတ်သန်းသွားနိုင်ပါတယ် ကောင်မလေးရယ်...။ ။
ညီလင်းသစ်
၆ အောက်တိုဘာ၊ ၂၀၀၈
You received this email because you are subscribed to the real_time feed for http://nyilinnthit.blogspot.com/feeds/posts/default. To change your subscription settings, please log into RSSFWD.